PRGI REGD NO : ORORI/25/A1991

Advertisement
NATIONAL

ଓଡ଼ିଶା ବିଧାନସଭାକୁ ଦେଶର ପ୍ରଥମ ନାଗରିକଙ୍କ ଆଗମନ ଓ ଉଦ୍‌ବୋଧନ

happylivingodisha@gmail.com 0

ଓଡ଼ିଶା ବିଧାନସଭାକୁ ଦେଶର ପ୍ରଥମ ନାଗରିକଙ୍କ ଆଗମନ ଓ ଉଦ୍‌ବୋଧନ

ସମ୍ମାନନୀୟା ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁ ମହୋଦୟା,

ଓଡ଼ିଶା ବିଧାନସଭାକୁ ଆପଣଙ୍କର ଆଜିର ଐତିହାସିକ ତଥା ମୂଲ୍ୟବାନ ସମ୍ବୋଧନ ନିମନ୍ତେ ଗଭୀର କୃତଜ୍ଞତା ଜ୍ଞାପନ କରୁଛି । ଦୀର୍ଘ ସାଢ଼େ ସାତ ଦଶନ୍ଧିର ଗଣତାନ୍ତ୍ରିକ ପରମ୍ପରାରେ ପ୍ରଥମ ଥର ପାଇଁ ଓଡ଼ିଶା ବିଧାନସଭାକୁ ଦେଶର ପ୍ରଥମ ନାଗରିକଙ୍କ ଆଗମନ ଓ ଉଦ୍‌ବୋଧନ କରିବାର ଏହି ସୌଭାଗ୍ୟ ଓଡ଼ିଶାର ରାଜନୈତିକ ଇତିହାସରେ ଏକ ଅବିସ୍ମରଣୀୟ ଅଧ୍ୟାୟ ସୃଷ୍ଟି କରିଛି। ଓଡ଼ିଶା ମାଟିର ଗର୍ବ ଭାବରେ, ଆପଣଙ୍କର ଏହି ପବିତ୍ର ଗୃହରୁ ରାଜନୈତିକ ଯାତ୍ରା ଆରମ୍ଭ କରି ଦେଶର ସର୍ବୋଚ୍ଚ ସାମ୍ବିଧାନିକ ପଦବୀରେ ଅଧିଷ୍ଠିତ ହେବା ସମଗ୍ର ଭାରତୀୟ ଗଣତନ୍ତ୍ରର ମୂଲ୍ୟବୋଧ ଏବଂ ଶକ୍ତିକୁ ପ୍ରତିପାଦିତ କରୁଛି। ଜଣେ ଜନଜାତି ମହିଳା ଭାବରେ ଆପଣଙ୍କର ଏହି ସଫଳତା ସମାଜର ପ୍ରତ୍ୟେକ ବର୍ଗ ବିଶେଷକରି ସାଧାରଣ ଓ ଗରିବ ଲୋକଙ୍କ ପାଇଁ ଉଜ୍ଜ୍ୱଳ ଦୃଷ୍ଟାନ୍ତ ଓ ଅସୀମ ପ୍ରେରଣା ସଦୃଶ। ଆପଣଙ୍କର ନୀତିନିଷ୍ଠ କାର୍ଯ୍ୟଶୈଳୀ ଏବଂ ରାଷ୍ଟ୍ର ପ୍ରତି ଥିବା ଉତ୍ସର୍ଗୀକୃତ ମନୋଭାବ ଆମ ସମସ୍ତଙ୍କ ପାଇଁ ଅନୁକରଣୀୟ। ଆପଣଙ୍କର ମାର୍ଗଦର୍ଶନ ଆମ ସରକାରର ‘ସବ୍‌କା ସାଥ୍, ସବ୍‌କା ବିକାଶ’ ସଂକଳ୍ପକୁ ଆହୁରି ଅଧିକ ଶକ୍ତିଶାଳୀ କରିଛି। ଆମ ସରକାର ଓଡ଼ିଶାବାସୀଙ୍କୁ ଏକ ସ୍ୱଚ୍ଛ, ଦକ୍ଷ ଓ ପ୍ରଗତିଶୀଳ ପ୍ରଶାସନିକ ବ୍ୟବସ୍ଥା ଯୋଗାଇ ଦେବା ପାଇଁ ଅଙ୍ଗୀକାରବଦ୍ଧ ଏବଂ ଏହି ମହତ୍ ଉଦ୍ଦେଶ୍ୟରେ ଆପଣଙ୍କର ମାର୍ଗଦର୍ଶନ ଆମକୁ ସର୍ବଦା ପଥ ପ୍ରଦର୍ଶନ କରିବ । ୨୦୩୬ ସୁଦ୍ଧା ସମୃଦ୍ଧ ଓଡ଼ିଶା ଗଠନ ଓ ୨୦୪୭ ସୁଦ୍ଧା ବିକଶିତ ଭାରତର ସ୍ୱପ୍ନ ସାକାର କରିବା ଦିଗରେ ଆମର ଯୋଗଦାନକୁ ଆମେ ସୁନିଶ୍ଚିତ କରିବୁ।

Happy Living Odisha
      
Related Story

Leave a Reply

Your email address will not be published. Required fields are marked *